28 Gusht 2025

Shkencëtarët kanë zbuluar në Marok, fosilet e një dinosauri të rrallë, i cili kishte gjemba një metër të gjatë që dilnin nga qafa e tij. Studiesit me humor e kanë cilësuar si “Punk Rroker” të periudhës xhurasike

Shkencëtarët zbuluan një dinozaur të veçantë në Marok, me thumba të gjate deri në një metër, të cilët i dilnin që nga pjesa e qafës dhe vazhdonin përgjatë trupit.

I quajtur si Spicomellus, kjo specie e rrallë jetoi 165 milionë vjet më parë dhe besohet se është shembulli më i vjetër i një grupi dinozaurish të quajtur ankilosaurë.

Për profesor Richard Butler nga Universiteti i Birminghamit, ky hulumtim është shumë domethënës pasi do të nxjerrë të dhëna të reja për një prej dinozaurëve më të rrallë.

“Është një nga dinozaurët më të çuditshëm të zbuluar ndonjëherë. Ne nuk e shohim këtë te asnjë kafshë tjetër, të gjallë apo të zhdukur.

Është absolutisht i mbuluar me thumba dhe zgjatime vërtet të çuditshme në të gjithë shpinën e kafshës, duke përfshirë një jakë kockore që mbështillet rreth qafës së saj dhe një lloj arme në fund të bishtit të saj, pra një dinozaur shumë i pazakontë”, tha ai.

Për herë të parë, në gjurmët e dinozaurit me gjemba ra një fermer i zonës, i cili e përshkruan si një moment paimagjinueshëm.

“Ishte një moment mahnitës dhe tronditës, ndoshta më emocionuesi në jetën time. Ishte e qartë menjëherë se kjo kafshë ishte shumë më e çuditshme nga sa e imagjinonim dhe se kishim mjaftueshëm prej saj për t’i dhënë kuptim”, tha ai.

Sfida për studiuesit tani, është të përcaktojnë teoritë se si evoluuan ankilosaurët.

“Këto kafshë mbijetuan deri vonë në kohën kur dinozaurët ishin në Tokë, në një periudhë të njohur si Kretake.

Kjo ishte midis 145 dhe 66 milionë vjet më parë. Fundi i kësaj periudhe pa shfaqjen e grabitqarëve të mëdhenj mishngrënës, siç është T Rex, kështu që mendohej se ankilosaurët filluan me pllaka të vogla të blinduara në shpinë, të cilat më pas u bënë më të mëdha dhe më të gjera për t’u mbrojtur nga këto kafshë të mëdha”, u shpreh profesor Maidment.

Në bazë të studimeve të kryera deri në këtë fazë, ankilosaurët kanë ekzistuar para periudhës Xhurasike të dinozaurëve, dhe cilësia e tyre dalluese ishin nofullat e mëdha.

Me fosilet e reja, studiuesit pritet të nxjerrin të tjera të dhëna mbi dinozaurët e këtij lloji.

Nga Anila Zyberaj, OraNews.